EHUagora abian da: EHUn Decidim-en hedapena diseinatzeko talde motorraren lehen topaketa

Joan den urriaren 8an, Leioako Campuseko Errektoretzaren eraikinean, EHUagoraren talde motorraren aurreneko bilera egin zen. Plataforma hori EHUren komunikazio eta parte-hartzerako plataforma berria da, eta Decidim du oinarri.

Decidim software libreko nazioarteko proiektu bat da, Bartzelonatik bultzatua eta mundu osoko erakunde publiko eta unibertsitario askotan erabilia. Parte-hartze demokratikorako azpiegitura digitala da, prozesu parte-hartzaileak diseinatzeko eta kudeatzeko aukera ematen duena, modu trazagarri eta gardenean, ekarpen bakoitza erregistratuta geratuko dela eta fase guztietan jarraitu ahal izango dela bermatuz. Subiranotasun teknologikoaren, pribatutasunaren eta ondasun komunaren printzipioetan oinarrituta, pertsonen eta komunitatearen zerbitzura jartzen du teknologia.

Topaketa hori EHUagora hedatzeko prozesuaren hasiera izan zen. Prozesu hori unibertsitateko komunitatea osatzen duten eragile guztien arteko komunikazioa hobetzeko pentsatuta dago, eta, aldi berean, gobernantza irekia indartzen du eta partaidetzaren kultura erantzukidea sustatzen du, unibertsitate demokratikoago eta konektatuago baterantz aurrera egiteko oinarri gisa.

Talde eragilea 13 lagunek osatzen dute, eta hiru errektoreordetzak eta bertako zuzendaritza eta teknikariak ordezkatzen dituzte, hiru esparru nagusietako ordezkariez gain —Komunikazioa, Parte-hartzea eta Azpiegitura Digitalak (IKT)—, Ikasleen Kontseiluak eta Administrazio eta Zerbitzuetako (AZP) langileek ere parte hartzen dute. Proiektuaren aurrerapenak koordinatzea eta talde, campus eta unibertsitate-kolektiboen arteko zeharkako lankidetza sustatzea da bere zeregina.

Saioan, parte-hartzaileek lehenengo aldiz aztertu zuten EHUagora-ren ingurua, barne-komunikazioko erronkei buruz hausnartu zuten, eta gai giltzarriak eztabaidatu zituzten, hala nola anonimotasuna eta erantzukizuna plataforman. Eztabaida irekita dago oraindik, eta unibertsitateko kide guztiak gonbidatzen ditu parte hartzera eta beren ikuspegia partekatzera.

EHUagoraren bidea gidatuko duten galdera ireki hauek ere utzi zituen bilerak: Nola bermatu parte-hartze benetan inklusiboa? eta zer paper jokatu behar du plataformak unibertsitateko eguneroko bizitzan?

Hurrengo saioan, taldeak EHUko aldez aurreko parte-hartze esperientziak aztertuko ditu, Decidim-eko adibideetan inspiratuko da eta EHUagoraren ikuspegia eta lehentasunak sortuko ditu, bere integrazioa unibertsitateko bizitzan definituz. Komunikazioan, parte-hartzean eta azpiegitura digitaletan lan egiteko taldeak ere osatuko dira.

Saioa amaitzeko, talde eragileko kide bakoitzak hitz bat esan zuen bilera agurtzeko, eta talde eragileak esaldi hau osatu zuen:

Anbizioz eta arduraz, unibertsitate komunitate osoak zeharkatuko duen eraldaketa demokratikoa amesten dugu: aldatzeko, ilusioa sortzeko eta EHUagoraren ametsa partekatua gauzatzeko aukera.